كفتة داوود باشا بالبطاطس من مطبخي – كل الأسرار وسر الصلصة التقيلة

 لو بتدوري على وصفة كفتة داوود باشا تضبط من أول مرة، طرية ومشبعة، والبطاطس مستوية والصلصة تقيلة بطعم غني... يبقى لازم تجربي طريقتي من مطبخي بكل أسراري 👌

---

📝 مكونات الكفتة:

نص كيلو لحمة مفرومة

بصلتين مفرومين

2 معلقة كبيرة برغل (منقوع ومتصفي)

ملح

فلفل أسود

بهارات مشكلة أو سبع بهارات

بصل بودر

توم بودر

🍅 مكونات الصلصة:

2 بطاطس مقطعة مكعبات

5 حبات طماطم مضروبة في الخلاط ومصفاة

2 معلقة كبيرة صلصة جاهزة

بصلة صغيرة مفرومة

معلقة كبيرة توم مفروم

نص معلقة صغيرة فلفل هريسة (اختياري)

معلقة صغيرة سكر

مكعب زبدة

2 معلقة كبيرة زيت ذرة

معلقة صغيرة مرقة لحم بودر

ملح

فلفل أسود

رشة قرفة

نص كوب ماء ساخن (عند الحاجة)

👩‍🍳 طريقة التحضير:

1. تحضير الكفتة:

نخلط البصل مع البرغل والتوابل كويس.

نضيف اللحمة ونعجن بإيدينا لحد ما الخليط يتماسك.

نكور الكفتة ونرصها في صينية مدهونة زيت خفيف.

ندخلها الفرن لحد ما تاخد لون خفيف وتستوي بنسبة 70%.

2. تحضير الصلصة التقيلة (السر الحقيقي):

في حلة على النار، نحط معلقة سكر ونسيبها تتحمص وتكرمل لحد ما لونها يبقى بني.

نضيف مكعب زبدة + 2 معلقة زيت ذرة ونقلبهم كويس.

نضيف البصلة المفرومة + التوم + الهريسة ونقلبهم مع 

بعض لحد ما يدبلوا وتظهر الريحة.

ننزل بـ 2 معلقة صلصة جاهزة ونشوحهم شوية – 

خطوة مهمة جدًا بتفرق في الطعم!

نضيف عصير الطماطم ونبدأ التتبيل:

ملح

فلفل أسود

مرقة بودر

رشة قرفة (ودي سر النكهة الرائعة)

نسيب الصلصة تتسبك على نار هادية لحد ما تتقل.

---

3. التجميع والتسوية:

نضيف كرات الكفتة والبطاطس للصلصة ونقلب بالراحة.

نزود شوية مية سخنة علشان البطاطس تستوي كويس.

نغطي الحلة ونسيبها حوالي 20–30 دقيقة على نار هادية.

بعد ما البطاطس تستوي والصلصة تتقل نقدمها سخنة

🍽️ اقتراحات التقديم:

رز بالشعرية

رز معمر

مكرونة بيضاء

عيش بلدي وسلطة خضراء

---

💡 أسراري في الوصفة:

البرغل بيخلي الكفتة طرية ومش بتنشف

تصفية الطماطم بتخلي الصلصة ناعمة وسلسة

السكر والكرملة في البداية بيفرقوا في اللون والطعم

القرفة والتشويحة مع الصلصة بتدي نكهة دافئة ومميزة

والهريسة بتضيف لسعة خفيفة تحبيها أو تستغني عنها حسب الذوق

---