سمك اللوط المقلى بتتبيلة مميزة و قرمشة و لون ولا اروع

مين قال إن رمضان ماينفعش 

فيه سمك؟!

بالعكس، ماينفعش يعدى رمضان

 

 من غير أكلة سمك حلوة 

وخفيفة تكسر روتين الأكلات 

المعتادة على سفرة الفطار. 

السمك من الأكلات اللذيذة 

والمحبوبة، وكمان بيكون اختيار 

رائع خصوصاً لو معمول بتتبيلة 

مظبوطة وطعم يفتح النفس.

وفي وصفة النهاردة هنعمل 

سمك لوط مقلي بطريقة سهلة 

وبسيطة، بتتبيلة مميزة تخلي 

طعمه خطير، مقرمش من بره 

وطري من جوه، وطعمه قريب 

جداً من سمك المطاعم.

مقادير السمك

2 كيلو سمك لوط (منظف ومقطع)

ممكن تكتفي بـ كيلو واحد 

حسب عدد أفراد الأسرة

2 ملعقة كبيرة ثوم مفروم

2 فلفل رومي

1 فلفل حامي

عصير ليمونة كاملة

1 ملعقة صغيرة خل

ملح حسب الرغبة

فلفل أسود

كمون

كزبرة ناشفة

ثوم بودر

للقلي

دقيق

1 ملعقة نشا

زيت غزير للقلي

طريقة تحضير سمك 

في الكبة نحط الثوم والفلفل 

الرومي والفلفل الحامي.

نضيف عصير الليمون والخل 

والملح والفلفل الأسود والكمون 

والكزبرة والثوم البودر.

نضرب كل المكونات في الكبة 

لحد ما نحصل على تتبيلة ناعمة.

نحط السمك في التتبيلة ونقلبه 

كويس بحيث كل القطع تتغطى 

بالتتبيلة.

نعصر ليمونة كمان على السمك 

ونسيبه في التلاجة حوالي ساعة 

علشان يتشرب الطعم.

نخلط الدقيق مع ملعقة نشا.

نطلع السمك من التتبيلة ونغمس 

كل قطعة في خليط الدقيق.

نقلي السمك في زيت غزير 

سخن لحد ما ياخد لون ذهبي 

جميل ويبقى مقرمش.

نطلعه على مناديل مطبخ علشان 

تمتص الزيت الزيادة.

طريقة تقديم سمك 

يتقدم سمك اللوط المقلي ساخن 

مع مجموعة من السلطات 

اللذيذة زي:

سلطة خضرا

سلطة الطحينة

سلطة البطاطس

سلطة البنجر

وكمان طبعاً ما ينفعش السمك 

من غير رز بني صيادية علشان 

تكمل الأكلة وتبقى وجبة بحرية 

رائعة على السفرة.

ولو حابين أي وصفة من وصفات 

السلطات أو الأرز الصيادية، 

سيبولي طلبكم في التعليقات 

وأنا هكتبها لكم بالتفصيل. 

فضلا وليس امرا الدعاء لوالدى 

بالرحمة والمغفرة